Thursday, April 19, 2018

RC MTAKA: WALIMU WA KIKE WASAIDIENI WANAFUNZI WA KIKE KUPATA ELIMU YA KUJITAMBUA


Mkuu wa Mkoa wa Simiyu, Mhe. Anthony Mtaka ametoa  wito kwa walimu wote wa kike mkoani humo kuwasaidia wanafunzi wa kike katika elimu ya kujitambua ili iwasaidie kuepukana na vishawishi vinavyoweza kupekelekea mimba za utotoni.

Mtaka ameyasema hayo jana katika Kongamano la Elimu ya Masuala ya Jinsia kwa Walimu na Wanafunzi wa Kike wa baadhi ya Shule za Msingi na Sekondari za Makao Makuu, kilichofanyika katika Shule ya Sekondari ya Kusekwa Memorial Mjini Bariadi.

Amesema si masuala yote ya yanayohusu maisha yamewekwa katika mitaala, hivyo walimu wanapaswa kusimama katika nafasi zao kama wazazi ili kile wanachotamani kuwafundisha watoto wao au ndugu zao kwa lengo la kuwalinda na tabia zisizofaa, wakifanye pia kwa wanafunzi wao wa kike ili wawasaidie wasiharibike.

Ameongeza kuwa Viongozi  na Watendaji mbalimbali wa Serikali Mkoani humo wanatamani wanafunzi wote wa kike wanaoanza darasa la kwanza na kidato cha kwanza wamalize masomo na kufikia ndoto zao pasipo vikwazo vyovyote ikiwemo mimba za utotoni.

“Tungehitaji kuona wanafunzi wa kike wa mkoa wetu wanajitambua, tusingehitaji kuwa na wanafunzi wa kike wanaopata mimba wakakatisha masomo yao na ndoto zao, natamani watoto wa kike wa Simiyu suala la elimu liwe Kipaumbele chao cha kwanza” alisema Mtaka

“Msaada wa kwanza wa watoto wetu wa kike ni walimu wetu wa kike, mwalimu anayewasimamia vizuri watoto wa kike  na kuwasaidia wasiharibike hata watoto wake nyumbani hawawezi kuharibika, ‘uki-ignore’ (ukipuuza) kwamba mwanafunzi hakuhusu kesho utakuta mwanao ndiye anayeharibikiwa” alisisitiza.


Wakati huo huo Mkuu huyo wa Mkoa amesema ipo haja na hoja kujenga mabweni ya wanafunzi wa kike kwa shule zote za Sekondari za Kata ili watoto wa kike wasipange wala kutembea mwendo mrefu. 

Kwa upande wake Hakimu Mfawidhi wa Wilaya ya Bariadi, Mhe.Mary Mrio amesema walimu wa kike wakiwasaidia na kuwa marafiki kwa watoto wa kike ni rahisi watoto kuwaeleza matatizo yanayowakabili na akawataka wanafunzi kuwa wawazi kwa walimu wao wa kike ili wasaidiwe.

Naye Mtaalamu wa Masuala ya Jinsia kutoka Shirika lisilo la Kiserikali la AMREF kupitia Mradi wa UZAZI UZIMA ametoa wito kwa watoto wa kike mkoani Simiyu kutokubali kutumiwa kama mitaji na wazazi wao kwa kukatishwa masomo na kuozeshwa mapema,  ili kukabiliana na  changamoto ya mimba za utotoni  katika kufikia ndoto zao.

Katika hatua nyingine wanafunzi wa kike wameiomba Serikali kuona namna ya kuwashirikisha wazazi na walezi wao katika makongamano ambayo yanatumika kutoa elimu ya masuala ya jinsia ili nao wawe na uelewa juu ya masuala hayo na kujua namna ya kuwasaidia watoto wao.

“Kwenye makongamano kama haya ingekuwa vizuri tukiwahusisha baadhi ya wazazi ili nao wapate elimu kama hii tunayopata sisi, maana sisi watoto wa kike kuna wakati unaweza  ukawa unaumwa  ila ukimweleza mzazi anasema hutaki kufanya kazi” Florencia Ndakama mwanafunzi wa Kidato cha Tatu Shule ya Sekondari Bariadi

Akitoa taarifa juu ya ushiriki wa wanafunzi na walimu wa kike katika kongamano hilo, Afisa Elimu wa Mkoa wa Simiyu, Mwl.Julius Nestory amesema jumla ya walimu 228 na wanafunzi 1506 kutoka katika baadhi ya shule za msingi na sekondari za Mjini Bariadi wameshiriki.
Mkuu wa Mkoa wa Simiyu, Mhe.Anthony Mtaka akizungumza na walimu na wanafunzi wa kike kutoka katika baadhi ya Shule za Msingi na Sekondari za Mjini Bariadi katika Kongamano la Elimu ya Masuala ya Jinsia lililofanyika jana katika Shule ya Sekondari ya  Kusekwa Memorial Mjini Bariadi.
Mwanafunzi kutoka Shule ya Sekondari kidinda akichangia jambo katika Kongamano la Elimu ya Masuala ya Kijinsia kwa walimu na wanafunzi wa kike kutoka katika baadhi ya Shule za Msingi na Sekondari za Mjini Bariadi, lililofanyika jana katika Shule ya Sekondari ya  Kusekwa Memorial Mjini Bariadi, (kulia) Mtaalamu wa Masuala ya Jinsia kutoka shirika lisilo la Kiserikali la AMREF.
Mwanafunzi kutoka Shule ya Sekondari kidinda akichangia jambo katika Kongamano la Elimu ya Masuala ya Jinsia kwa walimu na wanafunzi wa kike kutoka katika baadhi ya Shule za Msingi na Sekondari za Mjini Bariadi, lililofanyika jana katika Shule ya Sekondari ya  Kusekwa Memorial Mjini Bariadi.
Mwandishi wa Habari wa Gazeti la Nipashe, Bibi.Happy Severine akitoa mada katika Kongamano la Elimu ya Masuala ya Jinsia kwa walimu na wanafunzi wa kike kutoka katika baadhi ya Shule za Msingi na Sekondari za Mjini Bariadi, lililofanyika jana katika Shule ya Sekondari ya  Kusekwa Memorial Mjini Bariadi

Hakimu Mfawidhi wa Wilaya ya Bariadi, Mhe.Mary Mrio akitoa mada katika Kongamano la Elimu ya Masuala ya Jinsia kwa walimu na wanafunzi wa kike kutoka katika baadhi ya Shule za Msingi na Sekondari za Mjini Bariadi, lililofanyika jana katika Shule ya Sekondari ya  Kusekwa Memorial Mjini Bariadi.

Afisa Vijana wa Sekretarieti ya Mkoa wa Simiyu, Bibi.Zena Mchujuko akitoa mada katika Kongamano la Elimu ya Masuala ya Jinsia kwa walimu na wanafunzi wa kike kutoka katika baadhi ya Shule za Msingi na Sekondari za Mjini Bariadi, lililofanyika jana katika Shule ya Sekondari ya  Kusekwa Memorial Mjini Bariadi.

WAFANYABIASHARA MKOANI SIMIYU WAUNGA MKONO SERIKALI UJENZI WA SHULE YA SEKONDARI YA MKOA

Wafanyabiashara wa Mkoa wa Simiyu wamekubali kuunga mkono Serikali katika Ujenzi wa Shule ya Sekondari ya Mkoa wa Simiyu inayotarajiwa kuanza kujengwa mwezi Juni mwaka huu.


Kauli hiyo ilitolewa na Wafanyabiashara hao katika kikao chao na Mkuu wa Mkoa kilichofanyika  jana Mjini Bariadi, ambacho kilifanyika kwa lengo la kuzungumzia fursa za biashara na uwekezaji zilizopo mkoani humo, changamoto zinazowakabili na utatuzi wake.

Awali akifungua kikao hicho, Mkuu wa Mkoa wa Simiyu, Mhe.Anthony Mtaka amesema Serikali mkoani humo imekusudia kuwa na shule kubwa itakayoweza kuchukua wanafunzi 1000 ambayo itakayopatikana kwa kujenga upya shule ya Sekondari Simiyu (Kidato cha kwanza hadi cha Nne), ambapo aliahidi kuwa ofisi yake itatoa fedha kiasi na akawaomba wafanyabiasha wazawa kuchangia Ujenzi wa shule hiyo kwa ajili ya maendeleo ya Mkoa.

Amesema  pamoja na kujenga upya Shule ya Sekondari Simiyu, katika shule hiyo kutajengwa mabweni kwa ajili ya wanafunzi wa kike ili wanafunzi wote wa kike wasome wakiwa wanafunzi wa bweni(boarding).

Ameongeza kuwa shule hiyo itakuwa ikichukua wanafunzi watakaofanya vizuri kutoka katika wilaya nyingine ili waandaliwe vema na kuimarisha shule za Kidato cha Tano na Sita na kuwa katika uwezo wa kushindana na wenzao kutoka mikoa mingine.

Aidha, amesema mara baada ya kukamilisha kuimarisha Shule ya Sekondari ya Simiyu Mkoa huo umedhamiria kuwa na Shule ya Sekondari ya Wasichana Simiyu na Shule ya Sekondari ya Wavulana Simiyu,  ambazo zitapatikana kwa Kujenga Upya au  kubadili zilizopo kwa kibali maalumu cha Wizara yenye dhamana na Elimu, ili kuwa na shule mbili za mkoa moja ya wasichana na nyingine ya wavulana.

"Hatuwezi kuwa Makao Makuu ya Mkoa ambayo elimu yote inaishia Shule za Kata, ni lazima tutengeneze shule ambayo watoto wetu wakifanya vizuri katika wilaya zetu wanakuja kusoma hapa; hatuwaweza kushindana na kufanya mambo yote mazuri tuliyojadili hapa ya viwanda na mengine kama hatutaelimisha watu wetu" alisema.

Mwenyekiti wa Chama cha Wafanyabiashara Mkoa wa Simiyu Bw. Njalu Silanga amesema Wafanyabiashara wako tayari kuunga mkono juhudi za Serikali katika ujenzi wa Shule ya Mkoa jambo ambalo litakuwa mwendelezo wa kile kilichowahi kufanyika miaka iliyopita ambapo wafanyabiashara hao walijenga shule ya Sekondari Biashara na kuikabidhi kwa Serikali.

“Sisi wana Simiyu tunapenda maendeleo, tumewahi kukusanywa kama hivi leo tukakubaliana tukajenga Shule ya Sekondari Biashara tukaikabidhi Serikali, pia wapo watu hapa kwenye maeneo yao wamejenga madarasa tena ya viwango wakaikabidhi Serikali, kujenga Shule ya Sekondari ya Mkoa inawezekana” alisema  Njalu.

Wakati huo huo wafanyabiashara hao wameahidi kuwashirikisha Wafanyabiashara wengine ambao ni wazaliwa wa Mkoa wa Simiyu wanaofanya biashara zao katika mikoa mingine ili washirikiane katika kufanikisha Ujenzi wa Shule ya Sekondari Mkoa wa Simiyu.
Baadhi ya Wafanyabiashara wa Mkoa wa Simiyu, wakimsikiliza Mkuu wa Mkoa wa Simiyu, Mhe. Anthony Mtaka(hayupo pichani) katika kikao chao na Mkuu huyo wa Mkoa kilichofanyika jana Mjini Bariadi.
Mwenyekiti wa Chama cha Wafanyabiashara Mkoa wa Simiyu ambaye pia ni Mbunge wa Itilima Mhe. Njalu Silanga akizungumza katika kikao cha Wafanyabiashara wa Mkoa huo na Mkuu wa Mkoa huo katika Kikao kilichofanyika jana Mjini Bariadi.
Mkuu wa Mkoa wa Simiyu, Mhe.Anthony Mtaka akizungumza na Wafanyabiashara wa Mkoa huo katika kikao kilichofanyika Mjini Bariadi.
Baadhi ya Wafanyabiashara wa Mkoa wa Simiyu, wakimsikiliza Mkuu wa Mkoa wa Simiyu, Mhe. Anthony Mtaka(hayupo pichani) katika kikao chao na Mkuu huyo wa Mkoa kilichofanyika jana Mjini Bariadi.





Friday, April 13, 2018

WANAFUNZI 7361 KIDATO CHA NNE SIMIYU KUWEKA KAMBI YA KITAALUMA MWEZI JUNI


Wanafunzi 7,361 wa kidato cha nne kutoka katika shule za sekondari Mkoani SIMIYU wanatarajia kuweka kambi maalum ya kitaaluma ili kujiandaa na Mtihani wa Taifa na kuweza kuinua kiwango cha ufaulu mkoani humo.

 Kauli hiyo imetolewa na Mkuu wa Mkoa wa Simiyu, Mhe. Anthony Mtaka wakati alipokuwa akifunga Kambi ya Kitaaluma kwa wanafunzi 1005 wa Kidato cha Sita kutoka shule 11 Mkoani humo, waliokuwa chini ya Wakuu wa Shule 11 na walimu mahiri 40, wilayani Maswa.  

Lengo la kambi hii lilikuwa ni kutekeleza sehemu ya mkakati wa Mkoa huo wa kufuta daraja la nne na sifuri kwa kuwaandaa wanafunzi wa Kidato cha Sita Mkoani humo na Mtihani wa Taifa unaotarajiwa kufanyika mwanzoni mwa mwezi Mei.

Mtaka anasema baada ya kumalizika kambi hiyo ni matumaini ya Mkoa wa Simiyu kuona wanafunzi wanafaulu kwa kiwango cha daraja la kwanza na kufuta sifuri huku akitangaza kuanza kwa kambi ya wanafunzi wa kidato cha nne.

“Tumemaliza kambi ya Kidato cha Sita, natangaza rasmi leo kuwa tutakuwa na  Kambi ya Kidato cha Nne na Darasa la Saba mwezi Juni Mwaka huu, wanafunzi 7361 wa kidato cha nne watakaa kwenye kambi siku 21, kila wilaya itakaa na wanafunzi wake na mimi kama Mkuu wa Mkoa nitayafungua makambi hayo” alisema

“Baada ya kambi hiyo tutachukua wanafunzi bora watano katika kila shule baada ya mtihani wa Mkoa kufanyika ambao watatengeneza kambi kiwilaya pia,  ili tuchakate na kupata wanafunzi bora watakaotengeneza daraja la kwanza kwenye mkoa” alisisitiza

Aidha, Mtaka amesema anashauriana na Maafisa Elimu kuona uwezekano wa  kutengeneza kambi kwa ajili ya wanafunzi 10 ambao wanafanya vibaya kwa kila shule ili waweze kusaidiwa  na baaaye Mkoa uweze kuondokana kabisa na sifuri.

Ameongeza kuwa pia mwezi Juni wanafunzi 36,156 wa darasa la saba wataweka kambi na kambi zote mbili zitafunguliwa kwa pamoja, hivyo akatoa taarifa kuwa wadau wote wa elimu na watu wenye mapenzi mema watakapoombwa kuchangia ili kuwezesha kambi hizo wakubali kuunga mkono suala hilo.

Afisa Elimu wa Mkoa wa SIMIYU, Julius Nestory ameahidi kuwa kufikia mwaka 2020 kutakuwa na Mapinduzi makubwa ya Sekta ya Elimu katika Mkoa huo.

Wanafunzi wa kidato cha sita waliomaliza kambi iliyochukua takribani siku kumi wamesema kukutanishwa pamoja kumewasaidia hasa kwenye mada na maswali yalikuwa yanawasumbua, hivyo kwa sasa wamejiandaa vizuri na watafanya  vizuri katika Mtihani wao wa mwisho.

Katika hatua nyingine Mkuu wa Mkoa wa SIMIYU amesema Ofisi ya Mkuu wa Mkoa itatoa Shilingi Milioni Mbili kwa mwanafunzi atakayeingia katika kumi bora Kitaifa, Shilingi Milioni Tano kwa shule itakayokuwa miongoni mwa shule kumi bora na mwalimu mahiri atakayewezesha Alama A atapata Shilingi Laki mbili.
Mkuu wa Mkoa wa Simiyu, Mhe. Anthony Mtaka akizungumza na wanafunzi wa Kidato cha Sita kutoka shule 11 Mkoani humo wakati wa kufunga  Kambi ya Kitaaluma kwa wanafunzi hao 1005 katika Shule ya Sekondari ya Wasichana ya Maswa.
Afisa Elimu wa Mkoa wa Simiyu, Mwl.Julius Nestory akizungumza na wanafunzi wa Kidato cha Sita kutoka shule 11 Mkoan humo wakati wa kufunga  Kambi ya Kitaaluma kwa wanafunzi hao 1005 katika Shule ya Sekondari ya Wasichana ya Maswa.
Mwenyekiti wa CCM Mkoa wa Simiyu, Mhe. Enock Yakobo akizungumza na wanafunzi wa Kidato cha Sita kutoka shule 11 Mkoani humo wakati wa kufunga  Kambi ya Kitaaluma kwa wanafunzi hao 1005 katika Shule ya Sekondari ya Wasichana ya Maswa.
Baadhi ya wanafunzi wa Kidato cha Sita kutoa Shule 11 Mkoani Simiyu wakimsikiliza Mkuu wa Mkoa huo, Mhe.Anthony Mtaka katika zoezi la kufunga Kambi ya Kitaaluma kwa wanafunzi hao 1005 katika Shule ya Sekondari ya Wasichana ya Maswa.
Mkuu wa Mkoa wa Simiyu, Mhe.Anthony Mtaka (wa nne kulia) akiwa katika picha ya pamoja na baaadhi ya viongozi wa Chama na Serikali, Maafisa Elimu na wanafunzi baada ya   kufunga  Kambi ya Kitaaluma kwa wanafunzi wa Kidato cha Sita 1005 Mkoani humo katika Shule ya Sekondari ya Wasichana ya Maswa.
Mkuu wa Mkoa wa Simiyu, Mhe.Anthony Mtaka (wa nne kulia) akiwa katika picha ya pamoja na baaadhi ya viongozi wa Chama na Serikali, Wakuu wa Shule na wanafunzi baada ya   kufunga  Kambi ya Kitaaluma kwa wanafunzi wa Kidato cha Sita 1005 Mkoani humo katika Shule ya Sekondari ya Wasichana ya Maswa.
Mkuu wa Mkoa wa Simiyu, Mhe.Anthony Mtaka (wa nne kulia) akiwa katika picha ya pamoja na baaadhi ya viongozi wa Chama na Serikali, Walimu mahiri na wanafunzi baada ya   kufunga  Kambi ya Kitaaluma kwa wanafunzi wa Kidato cha Sita 1005 katika Shule ya Sekondari ya Wasichana ya Maswa


Thursday, April 12, 2018

MKURUGENZI TANTRADE ATOA WITO KWA MAKAMPUNI, WAKULIMA, WAFANYABIASHARA KUJIANDAA NA NANENANE MWAKA 2018 KANDA YA ZIWA MASHARIKI


Mkurugenzi Mkuu wa Mamlaka ya Maendeleo ya Biashara (TanTrade ) Edwin Rutageruka ametoa wito kwa wakulima,wafanyabiashara  na makampuni madogo Nchini kujiandaa  na kushiriki  maonesho ya Kilimo na Sikukuu ya Wakulima NaneNane ya Kanda ya Ziwa Mashariki  ili kujifunza teknolojia mpya  kutoka katika makampuni ya nje.

Maonesho hayo ambayo mwaka 2018 yanatarajia kufanyika kitaifa Mkoani Simiyu yameelezwa kuwa yatakuwa ya kipekee ikilinganishwa na miaka mingine   huku yakitoa fursa zaidi kwa wafanyabiashara na  makampuni  madogo kujitokeza kwa wingi kushiriki.

 Akizungumza  leo Aprili 12  katika kikao cha maandalizi  ya Nane Nane Kitaifa yanayotarajiwa kufanyika  Mkoani Simiyu, Mkurugenzi Mkuu wa TanTrade Edwin Rutageruka amesema kuwa taasisi yake iko tayari kutoa ushirikiano wa dhati  kwa uongozi wa Mkoa wa Simiyu ili kuhakikisha wanayafanya maonesho hayo kuwa ya kipekee.

 Amesema ni vema makampuni madogo, wakulima na wafanyabiashara wakajitokeza kushiriki maonesho hayo kwani watapata fursa ya kujifunza Teknolojia  mpya kutoka nchi za nje ambazo zitashiriki maonesho hayo.

“Ni vema Wafanyabiashara, wakulima na makampuni madogo yakajitokeza kushiriki maonesho hayo kwani tumejipanga vizuri, tumetenga maeneo mazuri na tutapanga kulingana na sekta mbalimbali ”alisema

Ameongeza kuwa katika kuyatangaza maonesho hayo ya Nane Nane ya mwaka huu 2018 , TanTrade itaandaa dawati maalum la kuutangaza rasmi Mkoa wa Simiyu na fursa zilizopo ili Watanzania na Wawekezaji wajitokeze kwa wingi kuwekeza.

Aidha,  Mkuu wa Mkoa wa Simiyu Anthony Mtaka amesema uwepo wa Maonesho ya Nane Nane Kanda ya Ziwa Mashariki  yatakayofanyika Mkoani humo, kwa kushirikiana na  Mikoa ya Mara na Shinyanga ambayo kwa pamoja inaunda Kanda hiyo, yatasaidia wakulima kujifunza kwa washiriki kutoka maeneo mbalimbali na hatimaye kuongeza thamani ya mazao yao.

Mtaka ameeleza kuwa mbali na Uwanja wa Maonesho kutumika kwa ajili ya Maonesho ya Sikukuu ya Wakulima Nane Nane, Uwanja huo utatumika katika shughuli mbalimbali  za kiuchumi ambazo zitawanufaisha kiuchumi wananchi na Taifa kwa ujumla.

Akizungumza kwa niaba ya Wafanyabiashara wa Mkoa wa Simiyu, Bw. Bahini Masunga amesema  kuwepo kwa Maonesho ya Nane Nane kutawasaidia Wafanyabiashara na wananchi kwa ujumla  kutambua fursa mbalimbali pamoja na kujiongezea ujuzi wa namna ya kuongeza thamani katika bidhaa zao.
Mkurugenzi Mkuu wa Mamlaka ya Maendeleo ya Biashara (TanTrade ) Edwin Rutageruka (katikati) akizungumza na baadhi ya viongozi wa Mkoa wa Simiyu katika kikao kilichofanyika Mjini Bariadi kujadili juu ya maandalizi ya Maonesho ya Kilimo na Sikukuu ya Wakulima Nane Nane Kitaifa mwaka 2018 ambayo itafanyika Kanda ya Ziwa Mashariki Mkoani Simiyu.
Mkuu wa Mkoa wa Simiyu, Mhe. Anthony Mtaka akisisitiza jambo  katika kikao kilichofanyika Mjini Bariadi kati ya Viongozi wa Mkoa huo  na Mkurugenzi Mkuu wa Mamlaka ya Maendeleo ya Biashara (TanTrade ) Bw. Edwin Rutageruka kujadili juu ya maandalizi ya Maonesho ya Kilimo na Sikukuu ya Wakulima Nane Nane Kitaifa mwaka 2018 , ambayo itafanyika Kanda ya Ziwa Mashariki Mkoani humo.
Mkurugenzi Mkuu wa Mamlaka ya Maendeleo ya Biashara (TanTrade ) Bw. Edwin Rutageruka(wa nne kushoto) akiwa katika picha ya pamoja na baadhi ya viongozi na watalam wa Mkoa wa Simiyu, baada ya kikao kilichofanyika Mjini Bariadi kujadili maandalizi ya Maonesho ya Kilimo na Sikukuu ya Wakulima Nane Nane Kitaifa mwaka 2018,  ambayo itafanyika Kanda ya Ziwa Mashariki Mkoani Simiyu.

Wednesday, April 11, 2018

KAYA 6120 ZA WALENGWA WA TASAF MKOANI SIMIYU ZALIMA PAMBA EKARI 8712 MSIMU WA MWAKA 2017/2018


Kaya 6120 sawa na asilimia 52 ya walengwa wa Mpango wa Kunusuru Kaya Maskini kupitia Mfuko wa Maendeleo ya Jamii (TASAF) katika Halmashauri ya Wilaya ya Bariadi Mkoani Simiyu zimewezeshwa kulima pamba ekari 8712 katika Msimu wa mwaka 2017/2018 kwa kutumia fedha za uhawilishaji.

Hayo yalibainishwa na  Mratibu wa TASAF Mkoa wa Simiyu Bw. Nyasilu Ndulu wakati wa   kikao cha kujenga uelewa wa pamoja kwa viongozi juu ya mpango huo kilichofanyika katika ukumbi wa KKKT mjini Bariadi.

Nyasilu amesema pamoja na kulima pamba walengwa wa mpango huo katika Wilaya ya Bariadi na wilaya nyingine Mkoani Simiyu kupitia fedha za uhawilishaji (wanazopewa) wamefanikiwa kujenga nyumba, kufuga, kuanzisha biashara ndogo ndogo na kujiunga na Mfuko wa Afya ya Jamii(CHF).

Ameongeza kuwa tangu kuanza kwa zoezi la uhawilishaji chini ya Mpango wa Kunusuru Kaya Maskini awamu ya tatu mwaka 2015 hadi sasa,  tayari awamu 17  za malipo zimekwisha fanyika kwa walengwa 37, 533 na jumla ya shilingi bilioni 28.9 zimelipwa kwa wahusika.

Amesema  fedha hizo zimejumuisha ruzuku za aina mbili ikiwa ni ruzuku ya msingi na ile itokanayo na utimizaji wa mashati ya Afya na Elimu ambapo watoto 39,068 sawa na asilimia 90.3 wameweza kupata mahitaji muhimu ya shule na kukuhudhuria shuleni na watoto 51, 280 sawa na asilimia 93.1 wamepata mahitaji ya kliniki na kupelekwa kliniki.

“Mpango wa Kunusuru Kaya Maskini umeweza kuwasaidia walengwa kujikwamua kutoka kwenye umaskini, wapo walioanzisha biashara, wanaolima, wanaofuga, waliojenga nyumba bora; kwa kutumia fedha hizi wanazopewa wapo ambao watoto walikuwa hawahudhurii shuleni na kliniki lakini sasa hivi mahudhurio mazuri” Alisema.

Mkuu wa Mkoa wa Simiyu, Mhe. Anthony Mtaka awali akifungua kikao amesema pamoja na mafanikio waliyoyapata walengwa, wanufaika wote waliofanya mambo  ya maendeleo ni vema wakawa mfano kwa wenzao huku akiwataka wale walioshindwa kuondolewa kwenye mpango huo.

Aidha, Mtaka  aliwataka  walengwa wote wa mpango kuendana na malengo ya nchi ya kuelekea kwenye Uchumi wa Kati ifikapo mwaka 2025 badala ya kuwaza kuendelea kubaki katika mpango huo.

“Mtazamo wangu mimi ni vizuri wanufaika wa TASAF waendane na Mpango wa Nchi, tunaposema tunataka kwenda kwenye Uchumi wa Kati kufikia mwaka 2025 wanufaika wa TASAF wanapaswa kujindaa kwenda kwenye uchumi wa kati, ili badala ya watu kutaka tu kuingia kwenye mpango,  tupate watu wanaotaka kutoka baada ya kupiga hatua na kutoka kwenye umaskini waliokuwa nao mwanzo” alifafanua Mtaka

Nae Bw. Fariji Mishael mtaalamu wa ufuatiliaji wa tathmini kutoka Ofisi ya TASAF Makao  makuu aliupongeza Mkoa wa Simiyu kwa kutekeleza mpango huo vizuri na kuomba wataalamu kuwasaidia walengwa walio kwenye maeneo yao katika  kuwashauri namna bora ya kuendesha miradi waliyoianzisha ili iwe endelevu na iweze kuwasaidia kiuchumi.


Mkuu wa Mkoa wa Simiyu, Mhe.Anthony Mtaka akizungumza na viongozi wa mkoa huo wakati alipofungua kikao cha kujenga uelewa wa pamoja kwa viongozi wa Mkoa huo juu ya Mpango wa Kunusuru Kaya Maskini kilichofanyika katika ukumbi wa KKKT mjini Bariadi.


Katibu Tawala wa Mkoa wa Simiyu, Ndg.Jumanne Sagini akizungumza na viongozi wa mkoa huo katika kikao cha kujenga uelewa wa pamoja kwa viongozi wa Mkoa huo juu ya Mpango wa Kunusuru Kaya Maskini kilichofanyika katika ukumbi wa KKKT mjini Bariadi.
 Mratibu wa TASAF Mkoa wa Simiyu, Ndg. Nyasilu Ndulu akiwasilisha Taarifa ya Utekelzaji wa Mpango wa Kunusuru Kaya Maskini mkoani humo, katika kikao cha kujenga uelewa wa pamoja kwa viongozi wa Mkoa huo juu ya Mpango wa Kunusuru Kaya Maskini kilichofanyika katika ukumbi wa KKKT mjini Bariadi.
Bw. Fariji Mishael mtaalamu wa ufuatiliaji wa tathmini kutoka Ofisi ya TASAF Makao  makuu akizungumza na viongozi wa Mkoa wa Simiyu, katika kikao cha kujenga uelewa wa pamoja kwa viongozi hao juu ya Mpango wa Kunusuru Kaya Maskini kilichofanyika katika ukumbi wa KKKT mjini Bariadi.




Baadhi ya Viongozi wa Mkoa wa Simiyu wakimsikiliza Mkuu wa Mkoa huo, Mhe.Anthony Mtaka katika cha kujenga uelewa wa pamoja kwa viongozi wa Mkoa huo juu ya Mpango wa Kunusuru Kaya Maskini kilichofanyika katika ukumbi wa KKKT mjini Bariadi.
Mkuu wa Wilaya ya Itilima Mhe.Benson Kilangi akichangia jambo katika kikao cha kujenga uelewa wa pamoja kwa viongozi wa mkoa wa Simiyu juu ya Mpango wa Kunusuru Kaya Maskini kilichofanyika katika ukumbi wa KKKT mjini Bariadi.
Katibu wa CCM Mkoa wa Simiyu, Ndg.Donald Magesa akichangia jambo, katika kikao cha kujenga uelewa wa pamoja kwa viongozi wa mkoa huo juu ya Mpango wa Kunusuru Kaya Maskini kilichofanyika katika ukumbi wa KKKT mjini Bariadi.
Mkuu wa Wilaya ya Meatu, Mhe.Dkt. Joseph Chilongani akichangia jambo katika kikao cha kujenga uelewa wa pamoja kwa viongozi wa mkoa wa Simiyu juu ya Mpango wa Kunusuru Kaya Maskini kilichofanyika katika ukumbi wa KKKT mjini Bariadi.



 Baadhi ya Viongozi wa Mkoa wa Simiyu wakimsikiliza Mkuu wa Mkoa huo, Mhe.Anthony Mtaka katika cha kujenga uelewa wa pamoja kwa viongozi wa Mkoa huo juu ya Mpango wa Kunusuru Kaya Maskini kilichofanyika katika ukumbi wa KKKT mjini Bariadi.

MWENYEKITI WA CCM MKOA AISHAURI SERIKALI KUZIPA KIPAUMBELE WILAYA MPYA SIMIYU UJENZI WA OFISI NA MAKAZI

Mwenyekiti wa CCM Mkoa wa Simiyu, Mhe. Enock Yakobo ameishauri Serikali kutoa kipaumbele kwa wilaya mpya za Busega na Itilima mkoani humo,  katika Ujenzi wa Ofisi na Nyumba za Watumishi ili watumishi waweze kufanya kazi katika mazingira mazuri.

Mhe. Yakobo ameyasema hayo Aprili 10,  alipotembelea na kuona Ujenzi wa Jengo la Halmashauri ya Wilaya ya Busega ambalo mpaka kukamilika kwake litagharimu shilingi bilioni 4.6 , wakati wa Ziara ya Kamati ya Siasa ya CCM Mkoa ya kukagua Utekelezaji wa Ilani ya CCM wilayani humo.

“Ingekuwa vizuri Ofisi na nyumba za watumishi zipatikane maana Busega imeshajitegemea, kama mkoa tuwe na kaulimbiu hiyo kuwa wilaya hizi mpya ziangaliwe; eneo hili ni changa linapaswa kuendelezwa ili watumishi wa hapa nao wafurahie utumishi wao”alisema Mhe.Yakobo

Mkuu wa Mkoa wa Simiyu, Mhe.Anthony Mtaka amesema Serikali ya Mkoa kwa kushirikiana na Wakurugenzi wa Halmashauri waliwasilisha suala hilo kwa Kamati ya Bunge na kuomba mkoa wa Simiyu kwa kuwa ni mpya uangaliwe sana kwenye mahitaji muhimu hususani yanayowagusa watumishi ikiwemo makazi.

“Ningependa kuwaomba Mwenyekiti wa CCM mkoa na Mjumbe wa NEC mlibebe jambo hili kama agenda ya Mkoa, sisi kama Serikali tulienda pamoja na Wakurugenzi kwenye Kamati ya Bunge, tukaomba kama Mkoa mpya waangalie mahitaji ya msingi hasa kwa watumishi, majengo yote haya tumeyaombea fedha na majengo ya Mkoa pia tumeyaombea fedha” alisema Mtaka.

Katibu Tawala Mkoa wa Simiyu, Ndg. Jumanne Sagini amesema Serikali imeshajenga nyumba nne (04) kwa ajili ya watumishi wa Halmasahuri ya Wilaya ya Busega na mpango wa kuendelea kupata fedha kwa ajili ya kujenga nyumba zilizobaki unaendelea.

Aidha, Sagini amesema Serikali imetenga fedha  kwa ajili ya kukamilisha jengo la Halmashauri ya Wilaya ya Busega, Ujenzi wa Ofisi ya Mkuu wa Wilaya ya Busega pamoja makazi yake.

Katika hatua nyingine Sagini amewataarifu wajumbe wa Kamati ya Siasa ya CCM Mkoa wa Simiyu kuwa fedha kwa ajili ya ujenzi wa Ofisi ya Mkuu wa Mkoa huo na  kukamilisha ujenzi wa Nyumba za Viongozi wa Mkoa zimetengwa.

Kamati ya Siasa ya CCM  Mkoa ikiongozwa na Mwenyekiti wa CCM Mkoa Mhe.Enock Yakobo pamoja na kukagua jengo la Halmashauri wilayani Busega ilikagua Miradi mingine ya maendeleo katika Sekta ya Maji, Elimu na Afya.
MWISHO

Baadhi ya Viongozi wa Serikali mkoa wa Simiyu na Wilaya ya Busega wakiwa na Wajumbe wa Kamati ya Siasa ya CCM Mkoa wa Simiyu, ikiongozwa na Mwenyekiti wa CCM Mkoa, Mhe.Enock Yakobo wakati walipotembelea mradi wa maji wa Lamadi katika ziara yao ya kukagua utekelezaji wa Ilani ya CCM wilayani humo.
Mkurugenzi Mtendaji wa Halmashauri ya Wilaya ya Busega, Ndg.Anderson Njiginya (katikati kushoto) akitoa maelezo kuhusu Jengo la Halmashauri hiyo kwa Wajumbe wa Kamati ya Siasa ya CCM Mkoa wa Simiyu, ikiongozwa na Mwenyekiti wa CCM Mkoa, Mhe.Enock Yakobo wakati walipotembelea mradi huo katika ziara yao ya kukagua utekelezaji wa Ilani ya CCM wilayani humo.
Mwenyekiti wa CCM Mkoa, Mhe.Enock Yakobo(kushoto) akimsikiliza Mkurugenzi wa Halmashauri ya Wilaya ya Busega, Ndg.Anderson Njiginya (kulia) akitoa maelezo juu ya ujenzi wa vyumba viwili vya maabara, katika Shule  inayojengwa Kijiji cha  Lukungu ambayo wananchi wanakusudia kuipa jina na Mkuu wa Mkoa huo, Mhe.Anthony Mtaka itakapokamilika, katika  ziara Kamati ya Siasa ya CCM Mkoawilayani Busega.
Baadhi ya Viongozi wa Serikali mkoa wa Simiyu na Wilaya ya Busega wakiwa na Wajumbe wa Kamati ya Siasa ya CCM Mkoa wa Simiyu, ikiongozwa na Mwenyekiti wa CCM Mkoa, Mhe.Enock Yakobo wakiingia katika moja ya Bweni lililojengwa Shule ya Sekondari Mkula kwa fedha za Mradi wa Lipa kulingana na Matokeo(P4R)  katika ziara yao ya kukagua utekelezaji wa Ilani ya CCM wilayani humo.

Tuesday, April 10, 2018

TASAF YAENDELEA KUWANUFAISHA WANANCHI MKOANI SIMIYU


Mfuko wa Maendeleo ya Jamii (TASAF) Awamu ya tatu umeendelea kunufaisha wananchi  wakiwemo wakazi wa kijiji cha  Nkoma wilaya ya Itilima  na  Nyakabindi    wilaya ya  Bariadi  mkoaniSimiyu.

 Hayo yamebainishwa na baadhi ya Wanufaika wa Mpango wa Kunusuru kaya maskini katika Kijiji cha Nkoma wilayani Itilima, Mtaa wa Nyakabindi na Mtaa wa Old Maswa wilayani Bariadi wakati wa ziara ya Kamati ya Siasa ya CCM Mkoa wa Simiyu ya kukagua utekelezaji wa Ilani ya CCM.

Mmoja wa wanufaika wa Mpango huo, Bibi. Rebecca Masunga kutoka Mtaa wa Nyakabindi wilayani Bariadi, amesema TASAF imemsaidia kutoka katika umaskini sasa anapata kipato kinachomwezesha kujikimu, kwa kuwa amelima ekari tatu za pamba, ekari moja ya mahindi, ana ng’ombe 14 na mbuzi wanne na amenunua plau kwa ajili ya kulimia.  

“Nilikuwa maskini wa kutupwa , nilipoingia TASAF na kuanza kupokea zile elfu 36 nilikopa fedha nikalima nyanya ekari moja nikauza, nilipata shilingi laki sita nikanunua ng’ombe watatu wakakua;  baadaye nikawauza nikapata milioni moja na laki tano nilinunua ng’ombe 14 ndiyo hao mnaowaona tunawachunga sasa” alisema Rebecca Masunga.

“Tuna kikundi chetu ambacho tunaweka fedha zetu baadaye tunagawana, tukisha gawana tunaenda kuzalisha, tunalima nyanya, kabeji, pamba halafu tunauza; mpango wangu wa baadaye niwe na mtaji mkubwa na nijenge nyumba bora ” alisisitiza Bibi.Masunga.

Nae Bibi. Stella Masamaki mkazi wa Old Maswa wilayani amesema kupitia mpango wa Kunusuru kaya maskini aliweza kukodi mashamba nakulima pamba, baada ya kuuza pamba akajenga nyumba bora ya vyumba vitatu na akatoka kwenye nyumba ya udongo.

Mwenyekiti wa CCM Mkoa wa Simiyu, Mhe. Enock Yakobo amewapongeza wanufaika wa TASAF ambao wamezitumia fedha hizo kwa manufaa na akawashauri kuanzisha miradi midogo midogo na kuwatumia wataalamu wa kilimo pamoja na mifugo kuwasaidia katika uendelezaji wa miradi yao ya kilimo na mifugo.

Katika hatua nyingine Mratibu wa TASAF Wilaya  Itilima Bw. John Rajabu amesema wanufaika wa Mpango wa Kunusuru kaya Maskini wameibua mradi wa maji ambao pia utawanufaisha na wananchi wengine, ambapo mpaka kukamilika kwake utatumia takribani milioni 15.

Wakati huo huo Wajumbe wa Kamati ya Siasa ya CCM Mkoa wa Simiyu wamefanya ziara katika Wilaya ya Meatu, Itilima na Maswa na kukagua miradi ya Maji, Afya na Elimu nakuwataka viongozi na watendaji katika maeneo husika kutimiza wajibu wao na kuhakikisha kuwa miradi yote inatekelezwa kwa viwango na kwa wakati ili wananchi waweze kupata huduma wanazostahili.

Sanjali na hilo wajumbe hao wamewataka viongozi kutambua fedha zinazochangwa na wananchi na kusimamia vizuri kwa ajili ya utekelezaji wa miradi mbalimbali ya maendeleo,  ili zitumike kama ilivyokusudiwa.
Baadhi ya Viongozi wa Serikali na Wajumbe wa Kamati ya Siasa ya CCM Mkoa  wa Simiyu wakikagua shamba la pamba la mnufaika wa Mpango wa Kunusuru kaya Maskini(TASAF), Bibi . Rebecca Masunga(mwenye kitambaa cheupe)  wa Mtaa wa Nyakabindi wilayani Bariadi wakati wa Ziara ya Kamati hiyo ya kukagua utekelezaji wa Ilani ya CCM wilayani humo.
Baadhi ya Viongozi wa Serikali na Wajumbe wa Kamati ya Siasa ya CCM Mkoa  wa Simiyu wakiangalia mifugo ya mnufaika wa Mpango wa Kunusuru kaya Maskini(TASAF), Bibi . Rebecca Masunga wa Mtaa wa Nyakabindi wilayani Bariadi wakati wa Ziara ya Kamati hiyo ya kukagua utekelezaji wa Ilani ya CCM wilayani humo.
Mwenyekiti wa CCM Mkoa wa Simiyu, Mhe. Enock Yakobo akimpongeza mnufaika wa Mpango wa Kunusuru kaya Maskini(TASAF), Bibi . Rebecca Masunga wa Mtaa wa Nyakabindi wilayani Bariadi kwa kununua jembe la kukokotwa na ng’ombe (plau) kwa ajili ya kulimia, wakati wa Ziara ya Kamati ya Siasa ya CCM Mkoa  wa Simiyu kukagua utekelezaji wa Ilani ya CCM wilayani humo.
Baadhi ya Viongozi wa Serikali na Wajumbe wa Kamati ya Siasa ya CCM Mkoa  wa Simiyu walipotembelea na kuona nyumba ya mnufaika wa Mpango wa Kunusuru kaya Maskini(TASAF), Bibi . Stella Masamaki  wa Mtaa wa Old Maswa wilayani Bariadi,  wakati wa Ziara ya Kamati hiyo ya kukagua utekelezaji wa Ilani ya CCM wilayani humo.
Mkuu wa Wilaya ya Bariadi, Mhe.Festo Kiswaga akitoa maelezo ya awali juu wanafaika wa TASAF III wilayani humo wakati wa Ziara ya Kamati ya Siasa ya CCM Mkoa  wa Simiyu kukagua utekelezaji wa Ilani ya CCM wilayani humo.
Mkuu wa Wilaya ya Itilima, Mhe.Benson Kilangi  akitoa maelezo ya awali juu mradi wa Maji ulioibuliwa na wanafaika wa TASAF III katika Kijiji cha Nkoma wilayani humo wakati wa Ziara ya Kamati ya Siasa ya CCM Mkoa  wa Simiyu kukagua utekelezaji wa Ilani ya CCM wilayani humo.
Mkuu wa Wilaya ya Itilima, Mhe.Benson Kilangi  akitoa maelezo ya awali juu mradi wa Maji ulioibuliwa na wanafaika wa TASAF III katika Kijiji cha Nkoma wilayani humo wakati wa Ziara ya Kamati ya Siasa ya CCM Mkoa  wa Simiyu kukagua utekelezaji wa Ilani ya CCM wilayani humo.

Mkurugenzi Mtendaji wa Halmashauri ya Wilaya ya Meatu, Ndg..Fabian Manoza akitoa maelezo kwa Wajumbe wa Kamati ya Siasa ya CCM Mkoa wa Simiyu na baadhi ya viongozi wa Serikali kuhusu Jengo la Wodi ya Wazazi linalojengwa katika Hospitali ya Wilaya ya Meatu, wakati wa ziara ya viongozi hao ya kukagua utekelezaji wa Ilani ya CCM wilayani humo.
Mkuu wa Wilaya ya Maswa, Mhe.Dkt. Seif Shekalaghe akitoa maelezo kwa Wajumbe wa Kamati ya Siasa ya CCM  Mkoa wa Simiyu na baadhi ya viongozi wa Serikali kuhusu Jengo la Zahanati ya Kijiji cha Mwandete inayojengwa kwa ushirikiano wa Serikali na wananchi, wakati wa ziara ya viongozi hao ya kukagua utekelezaji wa Ilani ya CCM wilayani humo.

Sunday, April 8, 2018

WADAU WATOA MSAADA WA FEDHA , CHAKULA KUWEZESHA KAMBI YA KITAALUMA KWA WANAFUNZI KIDATO CHA SITA SIMIYU


Wadau mbalimbali wa maendeleo wa Mkoa wa Simiyu wametoa shilingi Milioni 10 na Kilo 1200 za mchele, mafuta ya kula, sabuni , sukari na mahitaji mengine kwa ajili ya kuwezesha wanafunzi wa kidato cha Sita walioweka Kambi ya kitaaluma wilayani Maswa kwa ajili ya kujiandaa na Mtihani wa Taifa utakaofanyika mwezi Mei.

Akizungumza wakati wa makabidhiano katika Shule ya Sekondari ya Wasichana ya Maswa, Mkuu wa Mkoa wa Simiyu, Mhe.Anthony Mtaka amewataja wadau hao kuwa ni Ofisi yake iliyotoa shilingi milioni 10 kwa ajili ya kuongezea posho ya walimu mahiri 40 wanaowafundisha wanafunzi hao pamoja na kununua mahitaji maalumu kwa ajili ya wanafunzi wa kike.

Amesema wadau wengine ni Mbunge wa Itilima Mhe.Njalu Silanga aliyetoa kilo 500 za mchele, Mkurugenzi wa Halmashauri ya Wilaya ya Meatu kilo 300, Mkurugenzi wa Itilima kilo 100 za mchele, Mkurugenzi wa Halmashauri ya Wilaya Bariadi kilo 100 za mchele, Mkurugenzi wa Halmashauri ya Mji Bariadi kilo 100 za mchele na Mkurugenzi Busega kilo 100 za mchele.

Aidha, amesema Halmashauri ya Wilaya ya Maswa imeahidi kuchangia ng’ombe wawili na Ofisi ya Kamanda wa Polisi Mkoa wa Simiyu imeahidi kuchangia kilo 100 za mchele.

Mtaka amewashukuru wadau wote walioguswa kuwachangia wanafunzi hao wa kidato cha sita  na akatoa wito kwa wazazi, viongozi na watu kutoka makundi mbalimbali kujitokeza kuunga mkono juhudi zinazofanywa na Idara ya Elimu katika kuwasaidia wanafunzi hao, ili waweze kujiandaa na kufanya vizuri katika Mtihani wa Taifa mwezi Mei.

“Lengo letu ni kuhakikisha kuwa mwaka huu mkoa wetu unaingia kwenye mikoa itakayofanya vizuri zaidi Kitaifa, niendelee kuwaomba wanafunzi mliopo hapa mzingatie masomo siku 10 mtakazokaa hapa ziwe na manufaa kwenu na ninyi walimu 40 wafundisheni watoto kwa vipaji vyote mlivyojaliwa na Mwenyezi Mungu ili wafanye vizuri kwenye mtihani wao wa mwisho” alisema Mtaka.

Wakati huo huo Mkuu huyo wa Mkoa amesema baada ya kambi hiyo ya kitaaluma kumalizika ndani ya hizo siku10 ufanyike mtihani ili kuwapima wanafunzi na akaahidi kutoa zawadi ya shilingi milioni tano kwa walimu wataotunga maswali yatakayofanana na yale yatakayokuwepo katika Mtihani wa Taifa kwenye masomo yao.

Akizungumza kwa niaba ya walimu mahiri 40 wanaowafundisha wanafunzi kambini hapo Mwalimu Makame S. Makame kutoka Shule ya Sekondari Bariadi,  amesema kwa namna walivyojitolea kuwafundisha wanafunzi hao wana imani kubwa kuwa mwaka 2018 utakuwa mwaka matokeo mazuri(Kidato cha Sita)  ya kihistoria kwa Mkoa wa Simiyu.

Mwanafunzi Martina Simba kutoka Shule ya Sekondari ya Wasichana Maswa amemshukuru Mkuu wa Mkoa wa Simiyu na wadau wengine wote kwa misaada waliyoitoa na kusisitiza kuwa, kukaa kwao kambini hapo siku kumi hakutakuwa bure bali ni mwanzo mzuri wa safari yao ya mafanikio ya kuwafikisha katika mikoa itakayofanya vizuri zaidi katika Mtihani wa Kidato cha Sita mwaka 2018.

 Kambi ya Kitaaluma kwa wanafunzi wa Kidato cha Sita Mkoani Simiyu ilifunguliwa rasmi Aprili 3 ikiwa na jumla ya wanafunzi1003 kutoka shule 11 na walimu mahiri 40 kwa ajili ya kuwafundisha na inatarajiwa kufungwa Aprili 13, 2018.
Mkuu wa Mkoa wa Simiyu, Mhe.Anthony Mtaka (aliyeshika kipaza sauti) akizungumza na wanafunzi wa Kidato cha Sita kutoka katika Shule 11 mkoani humo walioweka kambi ya kitaaluma kwa ajili ya maandalizi ya Mtihani wa Taifa utakaofanyika Mwezi Mei, mara baada ya kukabidhi msaada wa vitu mbalimbali vilivyotolewa na wadau kwa ajili ya wanafunzi hao.

Mkuu wa Mkoa wa Simiyu, Mhe.Anthony akikata utepe kabla ya kakabidhi msaada wa vitu mbalimbali viliyotolewa na wadau kwa wanafunzi wa Kidato cha Sita kutoka katika Shule 11 mkoani humo, walioweka kambi ya kitaaluma kwa ajili ya maandalizi ya Mtihani wa Taifa utakaofanyika Mwezi Mei 2018. 
Afisa Elimu wa Mkoa wa Simiyu, Mwl.Julius Nestory akizungumza na wanafunzi  wa Kidato cha Sita kutoka katika Shule 11 mkoani humo walioweka kambi ya kitaaluma kwa ajili ya maandalizi ya Mtihani wa Taifa utakaofanyika Mwezi Mei mwaka huu.
Baadhi ya Walimu Mahiri wakimsikiliza Mkuu wa Mkoa wa Simiyu, Mhe.Anthony Mtaka(hayupo pichani) wakati alipokuwa akizungumza na wanafunzi wa Kidato cha Sita kutoka katika Shule 11 mkoani humo walioweka kambi ya kitaaluma kwa ajili ya maandalizi ya Mtihani wa Taifa utakaofanyika Mwezi Mei mwaka huu.
Mwanafunzi Martina Simba kutoka Shule ya Sekondari ya Wasichana Maswa akitoa shukrani kwa Viongozi wa Mkoa wa Simiyu kwa msaada wa chakula na mahitaji mengine uliotolewa kwa wanafunzi wa Kidato cha Sita kutoka katika Shule 11 mkoani humo walioweka kambi ya kitaaluma,kwa ajili ya maandalizi ya Mtihani wa Taifa utakaofanyika Mwezi Mei mwaka huu.
Baadhi ya wanafunzi wa Kidato cha Sita kutoka shule 11 za Mkoa wa Simiyu walioweka kambi ya kitaaluma kwa ajili ya maandalizi ya Mtihani wa Taifa utakaofanyika Mwezi Mei mwaka huu,  wakimsikiliza Mkuu wa Mkoa huo, Mhe.Anthony Mtaka(hayupo pichani) wakati alipokuwa akizungumza nao leo katika Ukumbi wa Shule ya Wasichana Maswa wilayani Maswa.
Majaliwa Chibona mmoja wa walimu 40 mahiri wanaowafundisha wanafunzi wa kidato cha sita kutokashule 11 mkoani Simiyu, ambao wameweka kambi ya Kitaaluma kwa ajili ya maandalizi ya Mtihani wa Taifa utakaofanyika mwezi Mei 2018, akitoa shukrani kwa viongozi waliotoa misaada mbalimbali kwa wanafunzi na walimu ili kuwezesha kambi hiyo kufanikiwa.
Baadhi ya wanafunzi wasichana wa Kidato cha Sita kutoka shule 11 mkoani Simiyu wakifurahia jambo na Mkuu wa Mkoa wa Simiyu, Mhe Anthony Mtaka na Mkuu wa Wilaya ya Maswa, Mhe.Dkt.Seif Shekalaghe(mwenye miwani) mara baada ya kukabidhiwa msaada wa chakula na mahitaji mbalimbali.


Powered by Blogger.
Subscribe Via Email

Subscribe to our newsletter to get the latest updates to your inbox. ;-)

Your email address is safe with us!