Na Stella Kalinga,
Simiyu
Waziri wa maliasili na utalii, Dk Hamis Kigwangala, amewataka wananchi wa
vijiji vinavyopakana na Hifadhi ya pori la akiba kijereshi lililoko
Wilayani Busega Mkoani Simiyu, ambao wameanzisha makazi na kufanya shughuli za
kijamii kwenye eneo la mitaa 500 (buffer zone) kutoka kwenye mpaka wa pori hilo
kuondoka mara moja.
Ametoa agizo hilo jana
alipotembelea pori hilo ikiwa ni mwendelezo wa ziara zake kwa ajili ya kukagua
shughuli za uhifadhi, baada ya kushuhudia makazi na shughuli nyingine za
kibinadamu ndani ya pori hilo kutoa agizo hilo na kusema kuwa sheria za
uhifadhi wa wanyamapori haziruhusu vitendo hivyo ndani ya maeneo
yaliyohifadhiwa kisheria pamoja na kingo zake (buffer zone) ambazo ni mita 500
kutoka kwenye mpaka halisi wa eneo la hifadhi.
"Mpaka
itakapofika tarehe 31 mwezi ujao wananchi wote hawa wawe wameshaondoka eneo
hili kwa hiari yao wenyewe, muwatangazie na mpime eneo hili vizuri muweke alama
ili wajue ni wapi wanatakiwa kuondoka.
"Na ikifika
tarehe 1 Septemba kama kuna watakaokuwa wamekaidi agizo hili, basi mfanye
oparesheni maalum muwaondoe na msafishe kila kitu, ni lazima ifike mahali kila
mmoja aheshimu sheria za nchi" alisema Dk. Kigwangalla kuuagiza uongozi wa
pori hilo.
Wakati huo huo, Waziri
Kigwangalla ametoa miezi mitatu kwa mwekezaji wa hoteli ya kitalii ya Kijereshi
Tented Camp kurudisha kwa Kamishna wa Ardhi hati miliki ya kipande cha ardhi
chenye ukubwa wa hekta 464 kilichopo ndani ya pori hilo kwakuwa ni batili; kwa
kuwa pori hilo lilianzishwa mwaka 1994 wakati mwekezaji huyo anadai kumilikishwa
eneo hilo mwaka 1995.
Aidha, amemtaka pia mwekezaji
huyo kuheshimu sheria na taratibu za uwekezaji katika eneo hilo ikiwemo kulipa
ada na tozo mbalimbali.
Awali akimweleza Waziri Meneja wa Pori hilo Diana Chambi alisema kuwa
wananchi waliovamia hifadhi ya pori hilo ni kutoka kwenye vijiji vya Lukungu,
Mwabayanda, mwakiloba, kijirishi pamoja na Igwata, ambao alieleza waliomba
kupewa muda mpaka mwezi Agosti mwaka huu wavune mazao waliyolima ili waondoke
kwa hiari kwenye eneo la hifadhi hiyo.
Kwa upande wake Mkuu wa Wilaya ya Busega Mhe.Tano Mwera, alimuomba waziri
kuisaidia idara ya Ardhi na Maliasili ya halmashauri hiyo Gari kwa ajili ya
kufanya doria mbalimbali kwenye hifadhi ya pori hilo ili kukabiliana na vitendo
vya ujangili pamoja na wanyama kuvamia makazi ya wananchi.
Mara baada ya kutembelea pori
hilo, Mhe.Waziri Kigwangala alikutana na kufanya mazungumzo na Mkuu wa Mkoa wa
Simiyu, Mhe.Anthony Mtaka ambaye amesema Mkoa huo unafanya juhudi katika kukuza
utalii kwa kujenga uwezo wa utamaduni wa ndani na kutangaza vivutio vya utalii
vilivyopo ikiwa ni pamoja na Mapori ya Akiba ya Maswa na Kijereshi.
Aidha, Mtaka aliongeza kuwa
Serikali imepanga kujenga uwanja wa ndege katika eneo la Igegu wilayani Bariadi
ambapo ni jirani kabisa na Hifadhi ya Taifaya Serengeti hivyo itawarahisishia
watalii kufikia kwa urahisi hifadhi ya Taifa ya Serengeti kufanya shughuli za Kitalii.
Pori la Akiba
Kijereshi lenye ukubwa wa kilomita za mraba 65.72 linasimamiwa na Mamlaka ya
Usimamizi wa Wanyamapori Tanzania TAWA na lilipandishwa hadhi kuwa Pori la
Akiba mwaka 1994 kwa Tangazo la Serikali Na. 215 la terehe 10 Juni, 1994 na
hiyo ni kutokana na umuhimu wake kiuchumi na kiikolojia hususan katika Hifadhi
ya Taifa ya Serengeti.
Waziri wa Maliasili na Utalii,
Dkt. Hamisi Kigwangalla akioneshwa mipaka ya Pori la Akiba Kijereshi na Meneja
wa pori hilo, Dianna Chambi alipotembelea pori hilo jana kwa ajili ya kukagua
shughuli za uhifadhi katika wilaya ya Busega mkoani Simiyu. Alitoa siku 45 kwa
wananchi wote waliovamia kingo/bafa za hifadhi hiyo kuondoka kwa hiari yao.
Kulia ni Mkuu wa Kanda wa Kikosi Dhidi ya Ujangili (KDU) Kanda ya Serengeti,
Johnson Msella.
Waziri wa Maliasili na Utalii, Dkt. Hamisi
Kigwangalla akitoa maelekezo kwa Meneja wa Pori la Akiba Kijereshi, Dianna
Chambi (wa pili) kuhusu wananchi waliovamia hifadhi hiyo alipotembelea pori
hilo jana kwa ajili ya kukagua shughuli za uhifadhi katika wilaya ya Busega
mkoani Simiyu.
Waziri wa Maliasili na
Utalii, Dkt. Hamisi Kigwangalla akikagua eneo la hoteli ya kitalii ya Kijereshi
Tented Camp iliyopo ndani ya Pori la Akiba Kijereshi alipotembelea pori hilo
jana kwa ajili ya kukagua shughuli za uhifadhi katika wilaya ya Busega mkoani
Simiyu.
Waziri wa Maliasili na Utalii, Dkt. Hamisi
Kigwangalla akizungumza na wananchi wa kijiji cha Logolambogo katika wilaya ya
Itilima mkoani Simiyu alipolitembelea Pori la Akiba Maswa jana kwa ajili ya
kukagua shughuli za uhifadhi na kutatua changamoto zake.
Waziri wa Maliasili na
Utalii, Dkt. Hamisi Kigwangalla akizungumza na Mkuu wa Mkoa wa Simiyu, Anthony
Mtaka alipowasili mkoani humo jana kwa ajili ya ziara ya kikazi ya siku moja ya
kukagua shughuli za uhifadhi na kutatua changamoto zake.
Waziri wa Maliasili na
Utalii, Dkt. Hamisi Kigwangalla akikagua moja ya eneo la kingo/bafa la Pori la
Akiba Maswa ambalo limevamiwa na wananchi kwa ajili ya shughuli kilimo
alipolitembelea pori hilo jana kwa ajili ya kukagua shughuli za uhifadhi katika
wilaya ya Itilima mkoani Simiyu. Kulia kwake ni Mbunge wa Itilima, Njalu Silanga
na Meneja wa Pori hilo, Lusato Masinde.
Mkuu wa Mkoa wa Simiyu,
Mhe.Anthony Mtaka akizungumza na Waziri wa Maliasili na Utalii, Dkt. Hamisi
Kigwangalla wakati wa ziara yake Mkoani humo jana.
Baadhi ya viongozi wakimsikiliza
Waziri wa Maliasili na Utalii, Dkt. Hamisi Kigwangalla wakati akizungumza na
viongozi wa Mkoa wa Simiyu wakati akiwa kwenye ziara ya kukagua shughuli za
uhifadhi jana mkoani humo.
Meneja wa Pori la Akiba
la Maswa mkoani Simiyu, Lusato Masinde akitoa ufafanuzi wa jambo kwa Waziri wa
Maliasili na Utalii, Dkt. Hamisi Kigwangalla wakati akizungumza na viongozi wa
Mkoa wa Simiyu wakati akiwa kwenye ziara ya kukagua shughuli za uhifadhi jana mkoani
humo.
Waziri wa Maliasili na
Utalii, Dkt. Hamisi Kigwangalla akisaini Kitabu cha wageni katika Ofisi ya Mkuu
wa Mkoa wa Simiyu mara baada ya kuwasili Mjini Bariadi, wakati akiwa katika
ziara ya kukagua shughuli za uhifadhi mkoani humo.
0 comments:
Post a Comment